Winston Churchill

Sir Winston Churchill (Woodstock, Oxfordshire, 30 November 1874 – Londen, 24 Januarie 1965) was 'n Britse politikus, veral bekend as Eerste Minister van die Verenigde Koninkryk tydens die Tweede Wêreldoorlog. Gedurende sy lewe het hy verskillende beroepe beoefen waaronder soldaat, joernalis, skrywer en politikus.

Aanhalings

Hoe verderflik die vervloekinge wat Mohammedanisme sy aanhangers oplê! Benewens die fanatieke raserny, wat by 'n man so gevaarlik is as hondsdolheid by 'n hond, is daar 'n onrusbarende fatalistiese apatie. Die uitwerking daarvan is in baie lande opmerklik. Agtelose gebruike, slordige landboustelsels, trae handelsmetodes en bedenklike sekuriteit van eiendom heers oral waar die volgelinge van die profeet regeer of woon. 'n Vervalle sensualisme ontneem hierdie lewe van sy grasie en verfyning, en die volgende van sy waardigheid en heiligheid. Die feit dat Mohammedaanse wet bepaal dat elke vrou aan 'n man moet behoort as sy absolute eiendom – hetsy as 'n kind, 'n vrou of 'n byvrou – bring mee dat die finale uitdelging van slawerny uitgestel moet word tot daardie dag wanneer die geloof in Islam sy sterk houvas op mans verloor het. Duisende word die dapper en lojale soldate van die geloof: hulle weet almal hoe om te sterf, maar die invloed van die godsdiens verlam die sosiale ontwikkeling van diegene wat dit navolg. Daar bestaan geen sterker retrograde krag ter wêreld nie. Mohammedanisme is ver van kwynend en is inderdaad 'n militante en proselitiserende geloof. Dit het reeds regdeur Sentraal-Afrika versprei en vreeslose krygers met elke nuwe tree opgewek; en sou die Christendom nie daarteen beskut gewees het deur die sterk wapen van die wetenskap nie, dieselde wetenskap waarteen dit vergeefs gestry het, kon die moderne Europese beskawing wellig tot 'n val gekom het, soos eens die beskawing van antieke Rome.
- Aangehaal uit The River War (1899)

Hier is 'n uitgestrekte vrugbare bodem wat benat word deur milde reën. Die gematigde son verwarm die lewe in die grond. Die koel bries verfris die inwoner. Die heerlike klimaat stimuleer die krag van die Europeër. Die hoofweg van die see wag op die opbrengs van sy arbeid. Die ganse natuur glimlag, en hier is eindelik 'n land waar wit mans kan regeer en voorspoedig wees. Tot dusver geniet net die trae Kaffer sy oorvloed, en die verouderde filosofie van Liberalisme bepaal dat dit immermeer so moet bly.
- Churchill se beskrywing van Suid-Afrika in The Boer War: London to Ladysmith Via Pretoria and Ian Hamilton's March (1900)

Mens kan 'n afkeur hê in Hitler se stelsel en nogtans sy patriotiese prestasie bewonder. As ons land verslaan sou word, hoop ek dat ons so 'n formidabele voorstander kan vind om ons moed op te bou en ons terug te lei na 'n plek onder die nasies.
- Churchill in "Hitler and His Choice" in The Strand-tydskrif, November 1935

Ons kan nie uitmaak of Hitler die man gaan wees wat opnuut 'n oorlog oor die wêreld laat losbrand waardeur die beskawing onafwendbaar die onderspit delf, en of hy hom 'n nagedagtenis sal verwerf as die man wat eer en gemoedsrus aan die groot Germaanse nasie herstel het nie.
- Churchill in "Hitler and His Choice" in The Strand-tydskrif, November 1935

Ek het nog altyd gesê dat as Groot-Brittanje in oorlog verslaan sou word, ek hoop dat ons 'n Hitler sal vind om ons terug te lei na ons regmatige posisie onder die nasies. Dit spyt my egter dat hy nie vermurwe word deur die groot welslae wat hom beskore was nie. Die ganse wêreld sal hul verbly om die Hitler van vrede en verdraagsaamheid te sien, en niks sal sy naam in wêreldgeskiedenis soveel eer besorg as dade van grootmoedigheid, en van barmhartigheid en medelye met die eensames en versaakdes, en met die swakkes en armes nie. Laat hierdie groot man sy eie gemoed en gewete ondersoek voordat hy iemand van oorlogsugtigheid beskuldig.
- In repliek op Hitler wat hom as "oorlogsugtige" brandmerk, soos aangehaal in "Mr. Churchill's Reply" in The Times (7 November 1938)

As Hitler die hel sou binneval, sal ek minstens 'n gunstige verwysing na die duiwel in die Laerhuis maak.
- Churchill aan sy persoonlike sekretaris John Colville op die vooraand van Operasie Barbarossa, die Duitse inval van die Sowjetunie in Junie 1941. Soos aangehaal deur Andrew Nagorski in The Greatest Battle (2007), Simon & Schuster, pp. 150-151. ISBN 0743281101

Hitler is 'n gedrog van boosheid, onversadiglik in sy bloedlus en plundersug. Onvergenoegd daarmee dat hy reeds die ganse Europa onder die knie het, of andersins tot verskillende vorme van onderdanigheid geïntimideer het, moet hy nou sy slagting- en verwoestingswerk na die groot menigtes van Rusland en Asië uitbrei. Die angswekkende militêre masjien – wat ons en die res van die beskaafde wêreld so dwaas, so gelate, so onbesonne toegelaat het om jaar na jaar uit byna niks deur die Nazi-bende opgebou te word – mag nie ledig staan nie, of dit sal roes of in stukke val. … Aldus moet hierdie bloeddorstige straatslyper sy gemeganiseerde leërs op nuwe slagtings-, plunder- en verwoestingsvelde loslaat.
- Churchill in 'n radio-uitsending rakende die Duitse inval van Rusland, 22 Junie 1941. Soos aangehaal in The Churchill War Papers: 1941 (1993), W.W. Norton, pp. 835-836. ISBN 0393019594

Sonder bronne

Ek het niks meer te bied as bloed, werk, trane en sweet nie.
Gee vir ons die gereedskap en ons sal die werk voltooi.